Улатӑр муниципаллӑ округӗнче вӑрман ҫунма пуҫланӑ. Пӑтӑрмах сӑлтавӗ — аҫа ҫапни.
Инкеке ӗнер, ҫӗртме уйӑхӗн 10-мӗшӗнче, 15 сехетре асӑрханӑ. Ҫалавҫӑсем пушар вырӑнне вӑхӑтра пырса ҫитсе вут-ҫулӑма ытлашши сарӑлса кайма паман, васкавлӑн сӳнтернӗ.
Эйпеҫ вӑрман хуҫалӑхӗнчи вӑрманти йывӑҫа аҫа ҫапнине пула пушар 0,035 гектар ҫинче алхаснӑ. Вут-ҫулӑма ҫур сехетрен сӳнтернӗ, мӗнпур ӗҫе 17 сехет те 30 минутра вӗҫленӗ.
Ҫак ӗҫе Вӑрман хуралӗн 5 ӗҫченӗ тата вӑрман хуҫалӑхӗнче тӑрӑшакан 10 специалист хутшӑннӑ. Вӗсем техникӑпа, ҫав шутра, плуглӑ тракторпа, ӗҫленӗ.
Республикӑри виҫӗ муниципалитет округӗнче пушар тухас хӑрушлӑх пысӑк пулнине палӑртнӑ. Паянхи кун тӗлне Улатӑр, Куславкка тата Сӗнтӗрвӑрри округӗсенче пушар хӑрушсӑрлӑхӗн 5-мӗш класӗ вӑйра.
Шупашкар, Ҫӗрпӳ, Вӑрмар, Шӑмӑршӑ, Пӑрачкав округӗсенче тата Шупашкар хулинче пушар тухас хӑрушлӑхӑн 4-мӗш класӗ пулнине палӑртнӑ.
Ҫавӑнпа асӑрханма ыйтаҫҫӗ: типӗ курӑк ҫунма, ҫынран килмен сӑлтава пула пушар тухма пултарать.
Улатӑр районӗнче мотоциклпа ҫула тухнӑ арҫын пурнӑҫӗ татӑлнӑ. Пӑтӑрмах ҫу уйӑхӗн 24-мӗшӗнче «Улатӑр – Стемас» ҫул ҫинче пулса иртнӗ.
Мотоциклиста кӗтмен ҫӗртен япӑх пулса кайнӑран вӑл транспорта чарса ӗлкӗрнӗ. Анчах, шел те, унӑн пурнӑҫӗ татӑлнӑ. Кун пирки «Алатырь без паники» Telegram-каналта пӗлтернӗ.
Пурнӑҫӗ татӑлнӑ ҫын пирки урӑх нимӗн те пӗлтермен. Вӑл миҫере пулнине те, вилӗм сӑлтавне те кӗске хыпарта ҫырман.
Улатӑр тӑрӑхӗнче пурӑнакан пӗр арҫын аптраса ӳкнӗ. Унӑн температури 38 градусран ытла хӑпарса кайнӑ, кӑкӑр шӑмми ыратнӑ, ӳслӗк аптӑратнӑ. Ларма, тӑма, выртма кансӗр пулнӑ.
Улатӑрти тухтӑрсем арҫын вилесле хӑрушлӑхра пулнине шута илсе Шупашкарти кардиологи центрне илсе ҫитерме шутланӑ. Унта ӑна вертолетпа диспансера илсе кайнӑ.
3 кун иртсен арҫын реанимацинчен тухнӑ. Халӗ вӑл хӑй тӗллӗн утса ҫӳреет.
«Контактра» халӑх тетелӗнчи «Вести Чувашии» ушкӑн пӗлтернӗ тӑрӑх, ҫу уйӑхӗн 17-мӗшӗнче Улатӑр округӗнчи Алтышево ялӗнче упӑшкипе арӑмне вӗлернӗ, унтан ҫуртне чӗртсе янӑ. Кайран ҫав ҫынсем вӗсен машинипе тарнӑ, ӑна хула хӗррине лартса хӑварнӑ.
Упӑшки - усламҫӑ, арӑмӗ кӗҫӗн классен вӗрентекенӗ пулнӑ. Малтанлӑха пӗлтернӗ тӑрӑх, вӗсене персе вӗлернӗ, унтан ҫуртне чӗртсе янӑ.
Ҫу уйӑхӗн 10-мӗшӗнче Улатӑр округӗнчи Иваньково-Ленино ялӗнче пушар пулнӑ. Шел те, инкексӗр иртмен – ҫулӑма сӳнтерсен кил хуҫин виллине тупнӑ. Вӑл – 60 ҫулти арҫын.
Пушар алхасма пуҫлани пирки 19 сехет те 20 минутра пӗлтернӗ. Пушарнӑйсем киличчен ҫулӑма пушар команди сӳнтерме тытӑннӑ. Малтанлӑха пӗлтернӗ тӑрӑх, «хӗрлӗ автан» пирус асӑрханмасӑр туртнӑран ташлама пуҫланӑ.
Палӑртмалла: ҫулталӑк пуҫланнӑранпа республикӑра 461 пушар пулнӑ. Вӗсенче 27 ҫыннӑн пурнӑҫӗ татӑлнӑ.
Чӑваш Енри ал ӗҫ ӑсти Светлана Куманейкина Мускавра иртекен «Раҫҫей» курав-форумра чӑннипех те тӗлӗнтернӗ. Вӑл - Улатӑр муниципаллӑ округӗнчи Анютино ялӗнчен.
Светлана курава килекенсем валли хӑйне евӗр стенд хатӗрленӗ. Унта пусмаран, мамӑкран хатӗрленӗ пуканесем, яппун вӗтӗ шӑрҫинчен хатӗрленӗ колье вырӑн тупнӑ.
Светлана Куманейкина куравра ал ӗҫ енӗпе ӑсталӑх класӗсем те ирттерет. Унта хӗрарӑмсем кӑна мар, арҫынсем те, ачасем те хаваспах хутшӑнаҫҫӗ.
Чӑваш Енре туристсем йышлӑ килсе ҫӳренине кура номе фондне пысӑклатса пыраҫҫӗ. Кӑҫалхи карлач-нарӑс уйӑхӗсенче хӑна ҫурчӗсенче чарӑннӑ туристсен шучӗ пӗтӗрхи ҫулталӑк пуҫламӑшӗнчи икӗ уйӑхринчен 28 процент ӳснӗ.
Чӑваш Енӗн Экономика аталанӑвӗн министерстви пӗлтернӗ тӑрӑх, экотруизм валли ҫӗнӗ вырӑнсене кӑҫал Шупашкар, Улатӑр, Куславкка, Красноармейски тата Канаш муниципаллӑ округӗсенче уҫма палӑртнӑ. Асӑннӑ тӑрӑхсенче 235 номерӗ 165 ҫурт туса лартмалла.
«Контактра» халӑх тетелӗнче улатӑрсем хӑйсене Чӗмпӗр облаҫне кӗртме ыйтса ҫырни пирки пӗлтернӗччӗ. Республика влаҫӗ кун пирки мӗн шутлать?
Пост тухнӑ хыҫҫӑн 16 сехетрен тӳре-шара комментари панӑ. Вӗсем каланӑ тӑрӑх, ҫакна йӗркеллех мар ҫын ҫырнӑ. Пост тухнӑ ушкӑнра ҫын та сахал-мӗн (унта 3,7 пин ытла ҫын). Пӗр сӑмахпа каласан, тӳре-шара ҫакна фейк тесе хакланӑ.
Аса илтерер: ҫак кунсенче Улатӑр тата Улатӑр округне пӗрлештерме йышӑннӑ. Кӗҫех ку ыйтупа халӑх итлевӗ иртмелле.
Паян ҫӗрле «Контактра» халӑх тетелӗнче «Алатырь» сообществӑра Чӗмпӗр облаҫне чӗнсе каланӑ хыпар вырнаҫтарнӑ. Улатӑрта пурӑнакансем облаҫ кӗпӗрнаттӑрне хулана хӑйсен йышне кӗртес ыйтӑва пӑхса тухма, референдум ирттерме сӗннӗ.
Акан 8-мӗшӗнче муниципалитет реформипе килӗшӳллӗн депутатсем Улатӑр хулипе округне пӗрлештерессишӗн сасӑланӑ. Ҫу уйӑхӗн 13-мӗшӗнче халӑх итлевӗ пулмалла.
Улатӑрсем халӑх тетелӗнчи хыпарта унччен вӗсем Чӗмпер кӗпернинче пулнине, 1925 ҫулта Чӑваш Енпе пӗрлештернине, вӗсем хӑйсен тымарне манманнине палӑртнӑ, «чылай ҫул ӗнтӗ регион правительстви хулана хӗстерет» тесе ҫырнӑ.
Сӑмах май, 2019 ҫулта улатӑрсем Мӑкшӑ Республикипе пӗрлештерме ыйтнӑ. Ҫакна вӗсем Саранск Шупашкартан ҫывӑхрах пулнипе сӑлтавланӑ.
-1.7 °C